डॉ. डी. बी. मार्ग पोलीस ठाण्यात रक्तदान शिबिर

सलग दुसऱ्या वर्षी डॉ डी बी मार्ग पोलीस दवाखान्यामार्फत शिबिराचे आयोजन 

मंगळवार दिनांक ७ एप्रिल २०२६ रोजी जागतिक आरोग्य दिनाच्या निमित्ताने डॉ. डी. बी. मार्ग पोलीस दवाखाना यांचेमार्फत  डॉ. डी. बी. मार्ग पोलीस ठाण्यात रक्तदान शिबिराचे आयोजन करण्यात आले होते. सकाळी ९ ते दुपारी २ या कालावधीत सदर शिबिर आयोजित करण्यात आले होते. शिबिरासाठी डॉ. हितेश पगारे यांच्या नेतृत्वाखालील जे. जे. रुग्णालयामधील राज्य रक्त संक्रमण परिषदेच्या ब्लड बँकेच्या टीममधील डॉक्टर व त्यांचे सहकारी यांनी महत्त्वाची भुमिका राबविली. डॉ. डी. बी. मार्ग पोलीस ठाण्याचे वरीष्ठ पोलीस निरीक्षक श्री. नितीन दळवी, पोलीस निरीक्षक श्री. प्रशांत पाटील व त्यांचे सर्व सहकारी पोलीस अधिकारी व अंमलदार यांनी आयोजनासाठी प्रत्यक्ष मदत करून सहकार्य केले.

सदर शिबिराचे उदघाटन नागपाडा पोलीस रुग्णालयाचे पोलीस शल्य चिकित्सक डॉ. गजानन सानप यांचे हस्ते पार पडले. रक्तदानाचे सार्वजनिक जीवनातील महत्व विषद करून त्यांनी रक्तदात्याना मार्गदर्शन केले. सदर शिबिरात एकूण ४५ रक्तदात्यांनी रक्तदान केले. उन्हाळ्यात नेहमीच रक्ताचा तुटवडा जाणवत असताना सदर शिबिरात झालेले रक्तदान मोठी उपलब्धी असल्याचे डॉ. सानप यांनी स्पष्ट केले. रक्तदान शिबिराच्या आयोजनात डॉ. डी. बी. मार्ग पोलीस दवाखान्याच्या सर्व कर्मचाऱ्यांनी परिश्रम घेऊन शिबीर यशस्वी होण्यासाठी मोलाची भूमिका बजावली. डॉ. डी. बी. मार्ग पोलीस दवाखान्याचे वैद्यकीय अधिकारी डॉ सुभाष घोलप यांनी हे शिबीर सलग दुसऱ्या वर्षी आयोजित करण्यात येत असल्याचे सांगुन आयोजनात सहभागी सर्व अधिकारी व कर्मचारी यांचे आभार मानले.

वैभव पाटील