आरोग्यमंथन - करोना - काळजी नको सावध राहा
कोरोना विषाणुचा प्रसार दिवसेंदिवस वाढताना दिसत आहे. जगभरातील अनेक देशांमध्ये या विषाणुने आपले जाळे पसरवण्यास सुरुवात केली आहे. भारतातदेखील काही भागात या विषाणूचे रुग्ण आढळले आहेत. ३१ डिसेंबर २०१९ रोजी चीन देशातील वुहान शहरात नवीन करोना विषाणूचा उद्रेक घोषित करण्यात आला. त्यानंतर चीनच्या इतर शहरात आणि प्रांतातही या आजाराचे रुग्ण आढळले असून दिनांक ०५ मार्च २०२० पर्यंत जगामध्ये एकुण ९५३३३ रुग्ण आणि चीनमध्ये ८०५६५ रुग्ण आढळले असून ३०१५ मृत्यू झाले आहेत. चीनच्या बाहेर भारतासह श्रीलंका, नेपाळ, जपान, थायलंड,दक्षिण कोरिया, अमेरिका, फ्रान्स, इराण, सिंगापूर, मलेशिया, जर्मनी, इटली, ऑस्ट्रेलिया, स्पेन, डेन्मार्क, पाकिस्तान इत्यादी ८५ देशांनीही या आजाराचे रुग्ण नोंदविले आहेत. जगातील चीन व्यतिरिक्त जपान मध्ये ६, फ्रांस ४ , ऑस्ट्रेलिया ३, स्पेन, थायलंड व फिलिपाईन्स येथे प्रत्येकी १ व रिपब्लिक ऑफ कोरिया मध्ये ३५ , अमेरिका-९, इराण ७७ , इराक -२ आणि व इटली मध्ये १०७ मृत्यू झाले आहेत. आज पर्यंत भारतामध्ये ३० रुग्ण आढळुन आले आहेत. त्यातील केरळमध्ये या आजाराचे ३ रुग्ण दिल्ली 2 व तेलंगना -१ व राजस्थान मध्ये १६, उत्तर प्रदेश ८ रुग्ण आहेत. करोना हे विषाणूच्या एका समूहाचं नाव आहे. साध्या सर्दी खोकल्यापासून ते सार्स (Severe Acute Respiratory Syndrome) किंवा मर्स (Middle East Respiratory Syndrome) यासारख्या गंभीर आजारासाठी करोना विषाणू कारणीभूत असतात. ही मुख्यत्वे श्वसनसंस्थेचे निगडीत असतात ती सर्वसाधारणपणे इन्फ्लुएन्झा आजारा सारखीच असतात. सर्दी ,खोकला, श्वास घ्यायला त्रास होणे , निमोनिया, काहीवेळा मूत्रपिंड निकामी होणे अशी लक्षणे मुख्यत्वेकरून आढळतात. या आजारास जागतिक आरोग्य संघटनेने कोविड -१९ असे नाव दिले आहे. करोना विषाणू मुळे होणारा आजार नेमका कसा पसरतो याबाबत अजून बरीचशी संदिग्धता असली तरी सर्वसाधारणपणे हा आजार हवेवाटे शिंकण्या खोकल्यातून जे थेंब बाहेर पडतात त्यातून पसरतो. करोना विषाणूचे मूळ स्थान प्राणी जगतात आहे.
Comments
Post a Comment